Ie Kinombura om Kinomulok (Binayagung) | Tangon Do Gulu-gulu

Di pogulu haro noh kaka duo tulun miobpinai,

ie pomungaranan do ie Kinomulok om ie Kinombura .

Poingion kaka yolo id sulap iri id disan do kokompungan.

Insan tadau, ongoi noh kaka ie Kinombura om ie Kinomulok pokisuduon hiri id kotolunan.

Koponingkukuuk nopo kaka ie manuk om pamanau noh kaka yolo.

Pokisuduon nodi yolo dii gisom nadahan.

Kopuriman nodi kaka ie Kinomulok om ie Kinombura do opodi tian do louson.

Poboros nodi kaka ie Kinomulok do, " Oi Kinombura, ulaa noh dato ti do mokisuduon. Kanou noh mongoi pokituhau pogulu om muli." kaka dau.

Tingkod nodi kaka yolo do mokisuduon om ongoi nodi yolo pogihum do tuhau.

Kokito nodi kaka iyolo do guas tuhau om timpuun nodi yolo mongukad do tua' tuhau. 

Sikog ka om koukad kaka ie Kinombura do tua' tuhau di agayo id soribau.

Ondos no kaka ginawo di Kinombura tu' nokokito do tua' tuhau di agayo.

" Diya doho tua' tuhau tagayo", kaka di Kinombura miampai do oimayaan kopio.

Gayato no kaka ie Kinombura ie tua' tuhau di nga koimbulai nogi ie tulu di Binayagung.

Takom no tomod kaka ie Binayagung di Kinombura do minikikabo.

Soira nakakabo' ie Kinombura, au nodi kaka mili ie Binayagung.

" Ili po Oyo, bobo'o ku poh ilo siduon," kaka di Kinombura nga amu nodi kaka mili ie Binayagung.

Au nodi kaka kopio katahan ie Kinombura dii tu poimbabo' nopo ie Binayagung.

 "Ili poh Oyo, ongoi oku poh tai,"kaka di Kinombura nga amu ie kaka ie Binayagung mumboyo. Poimbabo' no kaka di ngai mooi tai.

Bobos poh kaka di Kinombura do popoili nga amu ie milo. 

Au alaid korikot no kaka di yolo id sulap.

"Ili po Oyo, mongoi poh yahai sago," kaka di Kinomulok nga amu ie kasari mumboyo ie Binayagung.

Pimboros poh kagu ie Kinomulok," Ili poh kopio Oyo om mangan dahai iya pananakai tontolu' sampasuk."om umboyo nodi kaka ie Binayagung.

Ongoyo nodi kaka dio Kinomulok om Kinombura puhuo'o tontolu manuk hiri id kikimpuan,

om tonoko noh kaka dii hiri id kawa. 

Karakan nodi kaka diolo ie tontolu dii om pamanau nodii minongoi sago. 

 

"Karakan dokoyu kini idi," kaka di Binayagung.

"Oo...bah," simbar di Kinombura om ie Kinomulok.

Korikot nopo kaka ie Kinomulok mo ie Kinombura hiri sogohon, pinggutu no iyolo kaanu noh duo kutu. 

Tai no kawagu yolo goduo do hiri.

Poiliho noh kaka diolo ie kutu hiri id toning do tai.

"Haro nopo momolohou nga, amu poh noponu tangga kanto, " kaka di Kinomulok kumaa dii kutu. 

Kalapas dii, pamanau noh kaka ie Kinomulok om ie Kinombura do minogidu.

Iso nogi kaka nuluhon notoliban diolo om pomolohou nodi ie Binayagung.

"Idi, noonsok noh ie nonoyu!"

Simbaro noh kaka gia di kutu miagal dii pinonuhuan di Kinomulok om ie Kinombura.

"Kada poh Oyo, amu po noponu tangga," ka di kutu.

Tolu noh kaka gia dii nuluhon notoliban dio Kinomulok om pomolohou noh kaagu ie Binayagung.

"Idi, noonsok noh nonoyu!" kaka gia simbaro' no kawagu di kutu.

" Kada poh, Oyo. amu poh noponu tangga," kaka.

Turu noh kaka di nuluhon norikot dio Kinomulok.

"Idi, noonsok noh nonoyu!" kaka di Binayagung.

Miagal ie kaka gia kasari do ie kutu Suminimbar.

" amu poh noponu tangga Oyooo," kaka.

Amu nodii minumboyo ie Binayagung dii.

Molok-golok po kaka ie tontolu' tinanok nga ngoyo' nopo kaka di Binayagung roropo'.

Pamanau nodi iyau minongoi suhut di Kinomulok om Kinombura.

Korikot noh kaka ie Binayagung hiri id palu nga korikot noh kaka dau sopisirid-sirid ie kutu.

"Adiii! Ikoyu pama ri!" kaka di Binayagung do nadalaan totogod. 

Rarabo' no kaka dau ie kutu miampai di tai.

"Tuukoi! Ananom nodaa, suai podaa dii tinan, " kaka di Binayagung.

Gusao noh kaka di Binayagung ie Kinomulok om ie Kinombura nga amu noh kaka gia di nokogusa.

Sumosol podaa ginawo di Binayagung tu' noiman-iman...